Sain Minahali an Rawitdawit?

An rawitdawit
susog sa kawat kan hawak
gikan sa kalwag kan kalag
lagbas sa pigtatangro kan nguso,
dawa sabihon pang atang an pagtaram.

Balaog na yaon sa laog kan puso
pandugang sa dagmang na aram
bakong maimon na tataramon
an kinukurahaw kan silensyo,
kamurawayan--

Pa-Santa Cruz

Ama na samuyang inaarang
tawan na an uran na haluyon
nang minamawot kan puso niamo.
Surugon Mo lugod kami Kagurangnan,
Ika na samuyang namumutan.

Pagka-antos kan pa-Santa Cruz
sa kapilya, hinahalathalat niamo
an tandan na ibus
Ah, sasalbaron giraray
an samuyang pamanggihan.

Alagad mapatagama na kami
sa paratandan ta tibaad
sa liwat kami an maubosan
Mangkanos kan nagbabarasulan
sa oras nin urulian.

An Soap Opera Kan Sadiri

Isturya an bibilogon
sasaru-saruon
an mga pagirumdom,
pano an kwarta
gagastuson?

Halawig an hahalaton
na katapusan,
garo si mga sarabudan
na pangiturugan.

Pakabuka kan mata
insigida tulos
mapoon daing tapos
na isturya.

Pasko nin Sarong Gurang

Tambak
an kinakanan
na huhurugasan.

purukit na
patos nin
regalo
warairak
sa salog.

an mga minakurap-kurap
na bumbilya
na pigsarablay
sa bintana
hinulbot na
sa saksakan.

giraray
dai girong-girong
an kinaban

siring sa dati
piglalangkag
niya
si mayo.

Pagsukol nin bado

Iisipon ko na sanang magagamit taka
sa haruhalawig na panahon.
Idtong mahihiling ko pa
kun pano maludas an saimong kulor
Idtong ako pa mismo
an makakarisa kan mga parteng
igwang kinagatan
nin kino o makaka-aram
kun tano nababa
an laylayan mo.

Boot ko na ako pa
an mabakal nin pansalida saimo.
Dawa idto sanang dyison
idtong dai ako manhinayang
kun pira ko sana magamit
o kun ititon giraray nin kino

tsaga-tsagaan ko na
ta perang beses na sana man
gayod ini bubuluson.

Paghalat

Mabinino
an pag-abot
kan haloy na
piglangkag.

Igwang
puro
lambang
paghalat.

An mga Inaaling kan Banggi

Ngunian
nakamaratian
an kapagalan.

Ngunian
na nagpapahingaw
na an kinaban.

Ngunian
Pagkatarapos
kan gabos

Ngunian
giraray
nangururos.